Hyang Yesus Jagi Matilar saking Jagate
239 Wenten cerita sujati saking Cakepan Sucine,
indik Hyang Yesus ngajahin para sisian Idane,
sadereng Ida kapademang.
240 Risampune Hyang Yesus nguripin I Lasarus,
anake sane sampun padem punika,
akeh anake dados pracaya ring Hyang Yesus.
Nanging para pemimpin agama Ibranine iri ati ring Hyang Yesus.
Punika mawinan para pemimpin agamane ngrereh margi mangda sida ngamademang Hyang Yesus.
241 Nah kacerita mangkin,
Hyang Yesus uning galah Idane sampun rauh jagi matilar saking jagate,
mawali ring Sang Hyang Aji,
nenten tios Sang Hyang Tunggal.
242 Irika raris Hyang Yesus munduhang para sisian Idane saha ngandika,
243 “Tiang bakal luas ka purin Sang Hyang Aji.
Sakewala ragane tusing nyidang nugtug Tiang jani.
Eda ja ragane sengsaya,
sakewala pracaya ja kapining Sang Hyang Aji lan kapining Tiang.
Tiang kemu nyadyayang tongos buat ragane.
Yening suba sadya,
Tiang bakal mapagin tur ngajak ragane kemu.
Nanging ragane suba nawang jalane kemu.”
244 Nah raris,
asiki saking sisian Hyang Yesuse matur sapuniki,
245 “Titiang sami nenten uning kija Iratu luas.
Punapike carane titiang uning margine mrika?”
246 Raris Hyang Yesus ngandika malih sapuniki,
247 “Tiang tuah jalan lan kapatutan lan idup.
Tusing ada anake nyidayang rauh ring Sang Hyang Aji,
yening tusing malantaran Tiang.
Yening ragane nawang Tiang,
artine ragane nawang lan nyingak Sang Hyang Aji.
Nah ane jani,
Tiang lakar luas ring Sang Hyang Aji,
ento makada ragane sebet.
Sakewala luungan Tiang luas,
apanga Roh Sang Hyang Tunggal kautus sid ragane.
Roh Sang Hyang Tunggal bakal nulungin lan nuntun ragane,
apanga nawang kapatutan indik Sang Hyang Tunggal.
248 “Makejang ane ortiang Tiang ene,
apanga ragane maan dame krana ragane jangkep ajak Tiang.
Di gumine ene ragane bakal sengsara.
Sakewala pageh ja,
krana Tiang suba ngalahang kuasan gumine ene.”